برشة ما يعرفوش علاش الشعير يساهم في تخفيف الميزان؟ والإجابة إنّو فيه أقل سعرات حرارية وبرشة ألياف، تهضم المعدة وتخليك ديما تحس بالشبع وشاهيتك مسكرة.

وفي نفس الوقت يحافظ الشعير على بدنك خاتر فيه برشة فيتامينات ومعادن وكمية مالسكر، كيما نلقاو زادة نسب مالأملاح اللازمة للبدن وهي الكالسيوم والزنك والفسفور والحديد.

والمعروف إنّو مشروب الشعير منصوح بيه في الحمية الغذائية، ووقتلي تبدى الريجيم متاعك ما تنساش تعمل ½ كاس مالمشروب السحري هذا قبل ما تاكل بربع ساعة.

الوصفة تقول إنك تغليّ رطل شعير (بعد ما تنظفو مليح وتغسلو مالتراب) في 3 ليترات ماء، لدرجة تبقالك في الكسارولة 1.5 لتر، الكمية إلّي باش تشربها، شرط إنّك ما تفوتش الزوز كيسان في النهار (كان تحس روحك باش تنسى الوقت، تنجم تخلط الزوز كيسان المذكورين بالماء متاعك)

وخليني نذكرك إنك، على طول فترة الحمية الغذائية تنجم تخلّي الماكلة متاعك خاصة شوية، وتدخلّ فيها الشعير، كيما خبز الشعير، إلّي تنجم تحضرو وحدك وإلّي ما تستعمل فيه كان فارينة شعير، وإلاّ قهوة الشعير إلّي تحضرها بطريقة ساهلة وما تاخوش برشة وقت، وهوني نقلك ارحي الشعير بعد ما تحمرو وخليه في حكة، وكل ما تشتهي تعمل قهوتك حط منو شوية

من جهة أخرى، نلقاو في الشعير مادّة السيلينيوم إلّي تحافظ على الجلدة وتحمى البشرة ، كيما يساهم في تنظيف الكلاوي مالسموم ويفتفت الحجر إلّي فيها، ويعالج التهاب المثانة بخلاف إنّو ينظّف المعدة ويداويها مالإلتهابات (بالنسبة للّي عندهم عصب في المعدة وإلا بداية التهاب)
وما ننساوش إنّو الشعير عندو ميزة أخرى، تتمثل في حمايتو للبدن من برشة أنواع أورام، عافانا وعفاكم الله (وهوني المنصوح بيه بالنسبة للعائلات إلّي عندها مرض السرطان وراثي، انهم يتعودوا بماكلة الشعير ويحميو رواحهم)

وقبل ما نختم، نحب ننصح كل مرا حبلة، باش تاخو كاس من مشروب الشعير في النهار، خاصة في الـ3 أشهر الأولى خاتر في المادة هذي نلقاو نسبة عالية من حمض الفوليك إلّي يعاون على حماية الأجنة مالتشوهات