يتميّز البتراف بخصائص غذائيّة عندها أهميّة كبيرة، ويخليّه من الخضروات المثاليّة، إلّي ممكن إعتمادها وبصفة يومية في أطباقنا.

وين نلقاو في البتراف برشة فيتامينات: «C, A, B1, B2, B6 »، فضلا على وفرة المعادن: الكالسيوم، النغنسيوم، الصوديوم، النحاس، الفوسفور، من غير ما ننساو أوراقو إلّي رغم مرارتهم فإنّها تحتوي على الكلوروفيل أكثر مالسبناخ

ومن أهمّ وظائف البتراف إنّو يقاوم فقر الدم، ويجدّد خلايا الدم الأحمر وينشّطها وهذا يمدّد مالأكسيجان في البدن، كيما يساعد البتراف على مرونة الشرايين، وهذا يعني منع البدن، خاصة على مستوى الساقين مالتعرض للدوالي (الفاريز).

ولعصير البتراف برشة فوائد منها حماية البدن مالإصابة بسرطان القولون والمعدة، كيما يساهم في تخفيف الإمساك المزمن باعتبارو يحتوي على مادة السليلوز. هذا ويقوم البتراف بتنقية البدن مالسموم، وهذا راجع لتواجد الكولين، وبالتالي يساهم في معالجة الكبد من حالات التسمّم، والتهاب الكبد

والمنصوح بيه هو تناول البتراف مع عدد مالخضروات وإلاّ القوارص، على سبيل المثال:

يساهم عصير البتراف مع الليمون في القضاء على التسمم الغذائي، والإسهال والتقيّؤ.

أمّا عصير البتراف مع السفنّاريّة يعالج مختلف الأمراض إلّي ممكن تصيب المرارة والكلاوي

وبالنسبة للمصابين بالقرحة، يكفي إنهم يشربو مرتين وإلاّ 3 مرات في الأسبوع عصير بتراف مخلّط بالعسل شرط يكون عالخوا

برشة فوائد صحيّة موجودة في مختلف الخضروات والغلة، وباش تتمتّع بطاقة كبيرة وتحافظ على بدنك يكفي إنك تخصص شوية من وقتك وتعمل عصير صحّي ونافع كيما عصير البتراف الغنيّ بالفيتامينات