عالسلامة ومرحبا بيكم في أيامات سيدي رمضان، شهر البركة والصيام.. أيامات في طقسها موش مفهومة لاهي باردة ولاهي سخونة.. تحسها شتاء على صيف ومدخّلة فينا غولة.. أمّا التونسي يتأقلم مع الطقس وللعطش والجوع عندو الحل.. يرجع للماكلة التقليدية ويضرب كويّس بسيسة ينفع البدن

وكي نقولو بسيسة نقولو طاقة ونشاط وحيوية
نقولو ماكلة بالمعادن والفيتامينات غنيّة
رغم إنها في وقت قبل عالفقراء متسميّة
البسيسة ماكلة بنينة متوفر"ة على طول العام
كيما تقول مماتي يرحمها كي الملح ما يغيب على طعام
ميزة البسيسة في الصيف تبرّد البدن كيف نزيدوها الماء
وخلطة البسيسة بزيت الزيتونة تعطينا الدفى في الشتاء
هذا ما يخلّي االبسيسة مطلوبة في سيدي رمضان
كاس منها يطفي العطش بعد نهار صيام، وصفحة في السحور تشبعنا للي يقوم الآذان
هذاكة علاش برشة عائلات ما تتنصب السفرة كان والبسيسة حاضرة في قمصان
إنشاء الله سفرة دايمة وشهية طيبة