كلّ ما يدخل الصيف تولّي دبوزة الماء البارد رغبة كلّ شخص باش يوقف بيها العطش ويروي بدنو. أمّا إلّي ما يعرفوش برشة ناس كونو شرب الماء عندو قواعد لازم ينطبقوها، خاتر كاس ماء بارد ينجّم يكون مضرّة كبيرة وخطر يهدّد صحتنا من غير ما نشعرو.

أوّل حاجة لازمنا نفهمو إلّي الماء البارد يحرم البدن من إنّو يستفاد مالماكلة إلّي دخلتلو، خاتر الجهاز العظمي ماعادش يقوم بوظيفتو الأساسيّة، وهذا يرجع لفقدان الأوعية الدموية قدرتها على التقلّص بالشكل الصحيح بعد ما تشرب الماء البارد، والنتيجة الحتمية باش تكون ضعف في قدرة جهاز المناعة.

مالسلبيات زادة إنو البدن يفقد توازنو في ضمان الحرارة الداخليّة، وهذا باش يخليه يعمل مجهود أكثر حتّى يسترجع حرارتو إلّي فقدها، والنتيجة يولّي البدن تاعب.

من غير ما ننساو الأمراض إلّي ممكن يخلفها الماء البارد كيما التهاب الحلق، الأمراض التنفسية، و يتسبب الماء البارد في تخفيض نسبة ضربات القلب، إضافة لإمكانية الإصابة بسرطان الحنجرة، عفانا وعفاكم الله

والجدير بالذكر، إنّو شرب الماء دفعة وحدة يتسبب زادة في مضاعفات أخرى أبرزها تليّف الكبد، وفقدان الحويصلات الرئوية مرونتها، وهذا ما يخليّها تتضاعف.

هذاكة علاش المنصوح بيه، شرب الماء يكون حسب وضعية البدن، باش يتحقّق التوازن، بمعنى إذا كان عندك سخانة وإلاّ كنت تعمل في سبور وبدنك سخون، لازمك تشرب ماء بارد باش البدن يرجّع توازنو ويحافظ على طاقتو، أما إذا كنت في وضع طبيعي، في الدار وإلاّ في البيرو، أشرب ماء يكون في نفس درجة حرارة البلاصة إلّي إنت فيها، من غير ما تنسى إنّو شربان الماء لازم يكون وإنت قاعد،وكلّ ما تعطش تشرب الماء على 3 مرات موش مرة وحدة