"الماء أساس الحياة"، قاعدة نسمعونا من صغرنا، لكن السؤال المهم اليوم لكلّ أم...

قاعدة تشجّع في صغيرك باش يشرب الماء على طول النهار؟

المعروف إنّو الصغار كيف يعطشوا ما يقولوش، خاتر ما عندهمش وعي إلّي هو عطشانين، خاصة وقتلّي يلعبوا وإلاّ يقراو،وهوني يجي دور الأمّ باش تكون رقيبة على صغرها وحارصة على توفير الكميّة اللازمة مالمياه لبدوناتهم.

وبما أنو أحنا على أبواب العودة المدرسية وصغيرك باش يكون بعيد على عينيك نهار كامل تقريبا، ننصحك باش تخلق أساليب توعويّة في الدار بأهميّة شرب الماء في أي وقت من غير ما تحسّس صغيرك إنّو الكلام موجّه ليه بصفة مباشرة، كيما الحديث قدامو على أهميّة الماء في حماية البدن من خطر الجفاف، وكيفاش يعاوننا باش نتخلصو مالفضلات إلّي ما عندهاش منفعة وإلّي ممكن تضرنا إذا بقات في أجسادنا، كيما يمكن الحديث على الدور إلّي يلعبوا الماء في صحّة الدورة الدمويّة، وهوني تحكي على النشاط والحيوية إلّي يحظى بيها الإنسان.

وباش تخلق الأم أفكار جديدة وحيل تخليّ صغيرها يشرب الماء بصفة منتظمة، أوّل حاجة تتذكّرها كونو الصغار تحب الألوان، وهوني لازم كاس الماء متاعو يبدى ملون وإلاّ فيه رسم لشخصية كرتونية هو يحبها، لذا خلّي صغيرك هو إلّي يختار الكاس متاعو كيف تشري، بشرط إنّك تعلمو باش يعبيه بالماء وحدو ويشرب منو ديما.

وفي النقطة هذي يمكن للأم تخلق فكرة اخرى، وهي اعتماد منافسة في شرب الماء بينها وبين صغيرها وإلاّ بين صغارها إذا كان عندها أكثر من صغير، وتحسسو إلّي يشرب ماء أكثر طول النهار عندو مكافئة كيما يشري الحلوى، وإلاّ يتمتّع بمحواسة وإلاّ اي مكافئة بسيطة تراها الأم تفرّح صغيرها.

وإذا صغيرك يحب نوع متاع غلّة معيّن وإلاّ تعرفوا ياكل الغلة بأنواعها، أحرص باش تحط طرنشات منها في كاس الماء، كيما الفراز، البرقدان وغيرها.

وللإشارة فإنّو بدن الصغير في حاجة للماء من 5 لـ11 كوب في النهار يوميا، حسب العمر والجنس.

والجدير بالذكر إنّو توفير الماء للبدن ما ينحصرش فقط في شرب الماء، وهوني لازم كل أم تفهم إلّي تناول الصغير للمشروبات والعصير، مهم، وحاول باش كل مرة تعمل عصير غلة بنين تخلي صغيرك يكمّل الكاس متاعو، وحتى في الوجبات الغذائية، احرص باش تكون الشربة من بين الأطباق متاعك، وما تشدّش في نوع واحد باش صغيرك ما يقلقش ويكرها، كيما شربة الشعير، لسان العصفور، برودو، حساء السفارية وغيرها مالأنواع إلّي تضمن للبدن كمية هامة مالماء.