كيما يقولو الصيف ضيف، وأحنا الجمعة هذي ودّعنا ضيفنا ورجعنا للخدمة والروتين، ورجع نهار الأحد هو النهار العظيم

نهيّر تتقابل فيه العائلة كبير وصغير، ويتسمّى عند الوالدة نهار الخير، تلقاها تكنبس وتخمّم على الطاولة قبل بنهارين.

هذاكة علاش هديتي ليك طاولة بالخيرات السبعة معمّرة، والزنود ليها مشمّرة
 

وكيما يقولو المناني عزّ الحوت، عليه عائلتك تفنى وتموت، حضّر كسكسي بالماني يعمل الكيف وبيه تودّع جوّ البحورات والصيف

صحيفة الكسكسي وكاس اللبن من غير صحيّن سلاطة، الحق مساطة، ومادامك تعرف إلّي السلايط أشكال وأنواع، خليك زمنية وأعمل سلاطة خضراء تونسيّة

بالطبيعة من غير ما تخمّم عالطواجن، خاتر المعقودة بالرنقة تخليك ديما في جوّ الصيف وتحضيرها ساهل وخفيف

ماشاء الله على فطورك قداش قمقوم، بعدو العائلة تتمنى تعسيلة وإنت تكره النوم، مالة إلقف الهدرة وقدملهم سيتروناد بالزنجبيل يهظّم الماكل ويطير النوم مالعين

وباش ما يقولوش عليك ما مغرومة كان بالماكلة التونسيّة، ورّيهم إلّي إنت تفهم في الكوجينات الأجنبيّة وأعمل قلاس بالفراز لقعدة العشوية

أيا إنشاء الله تكون بالدبارة فرحانة، وكان عجبتك الفكرة ما عليك كان تنفض ريشك وتهز القفة، شدّ ثية المرشي أخطف القضية