الوصف

إلّي يعزّ أحبابو.. يضيّفهم عالكبكابو.. حوتة مفوحة ومقلية، مالمقلى نلقاوها في المرقة مرمية، دبارة الليمون والكبار زينتها يا سعدها إلّي تتعلّم وصفتها



المقادير

  • 1/2 مغرفة كبيرة هريسة
  • 1/2 مغرفة كبيرة فلفل أحمر
  • 1 مغرفة كبيرة طماطم معجونة
  • 4 مغارف كبار زيت
  • 50 غرام كبار
  • 50 غرام بصل مقصوص
  • 100 غرام ليمون مملح
  • 750 غرام (حوت حجم كبير ( مناني، قلعاية، البلميت
  • 1 مغرفة كبيرة تابل
  • 1 مغرفة صغيرة خل
  • 1 رشة فلفل أكحل
  • 1 رشة ملح

طريقة التحضير

  • 1 - نظف الحوت مليح وقصو طروف متساوية
  • 2 - فوّح الحوت بالتابل + الملح + الفلفل أكحل
  • 3 - أقلي الحوت في زيت سخون وخليها على جنب
  • 4 - نظّف الليمون الملّح وقصّو طرونشات من غير ما تقشرو
  • 5 - قلّي في طنجرة: البصل + الطماطم + الهريسة + فلفل أحمر
  • 6 - امرق الطنجرة بالماء وبعد ربع ساعة سقّط وسطها الحوت + الكبار + الليمون
  • 7 - بعد 10 دقائق زيد الخل وتفقد الملح وصحّة وبالشفاء

نصيحة الشاف

لليّ مغرومين بالحمية الغذائيّة نقلهم مغرفة خل في كاس ماء تعاون برشة على تنقيص الميزان