الوصف

اللازانيا أشكال وألوان... من بينها لازانيا بالباذنجان... وكان تحب تعرف أصلها وفصلها.. خليني نقلك اللازانيا ماكلة طليانية رغم إلّي أصل الكلمة يرجع للإغريقيّة.. أيا خلينا توة من أصلها وعروقها.. جرّب وصفة اليوم وأعطيني رايك بعد ما تذوقها...



المقادير

  • 1 رطل لحم مفروم
  • 1 فص ثوم مهرّس
  • 1 راس بصل مرحي
  • 1 مغرفة كبيرة زيت
  • 2.5 كوب جبن مرحي
  • 2 طوابع مرقة دجاج
  • 2 مغارف كبار فارينة
  • 2 كوب حليب
  • 1/2 كوب خل أبيض
  • 2 كيلوغرام باذنجان مقصوص طرونشات
  • 1/2 كوب جبن موتزاريلا مرحي

طريقة التحضير

  • 1 - خلّط الحليب + الفارينة + طابع كنور وحطهم عالغاز وأبقى حرّك لين الطنجرة تغلي
  • 2 - خلي الطنجرة فوق الغاز 3 دقائق وهبطها
  • 3 - قلّي في طنجرة أخرى: البصل + الثوم + الزيت + اللحم المفروم
  • 4 - زيد فوقهم خل أبيض ومن بعد حرّك الطنجرة وخليها لمدة 20 دقيقة على نار هادئة
  • 5 - أقلي طرونشات الباذنجان
  • 6 - خوذ طبق فور وادهنو بالزبدة
  • 7 - أعمل فرشة باذنجان مقلي + فرشة من لحم مفروم (حط ثلث الكمية) + فرشة صلصلة بيضة
  • 8 - عاود نفس العملية لين تكمل الكمية إلّي عندك
  • 9 - رش الطبق مالفوق بالموتزاريلا والجبن المرحي بعد ما تخلطهم
  • 10 - دخّل الطبق للفور لمدة من 35 لـ40 دقيقة وتحت درجة حرارة 200

نصيحة الشاف

طبق الفور لازم يكون غارق وديما خلّي الفور متاعك يسخن شوية قبل ما تستعملو