الوصف

أمّي وأمّك ما يفهموش إلّي الملسوقة أصولها أندلسية، أما يعرفو إلّي هي من بين العولة حسب عاداتنا الزمنية، ونساو يعلمونا تحضيرها في الدار، رغم قيمتها في كلّ رمضان، هذاكة علاش نقلك تبعني خطوة خطوة وشدّ عندك الحكار



المقادير

  • 150 غرام فارينة
  • 150 مليلتر ماء
  • 1.5 مغرفة كبيرة نشاء
  • 1.5 مغرفة كبيرة زيت
  • 1 رشة ملح

طريقة التحضير

  • 1 - حطّ في الخلاط: فارينة + ماء + نشاء + زيت + ملح واركضهم مليح لمدة 5 دقائق
  • 2 - صب العجينة إلّي باش تلقاها خاثرة شوية في صحفة
  • 3 - سخّن طنجرة ماء
  • 4 - حطّ مقلى فوق الطنجرة
  • 5 - خوذ فوشة وغطّسها في العجينة وادهن بيها القلاية
  • 6 - عاود العملية لين تتحصل على ورقة ملسوقة تطيب في ظرف من 2 لـ3 دقائق
  • 7 - كمل كمية العجينة الكل وما تنساش تحطّ منديلة بين أوراق الملسوقة
  • 8 - خلّي الملسوقة تبرد مليح ومن بعد قسمها حسب الحاجة وحطّها في ساشيات وخبّيها في الكونجيلاتور

نصيحة الشاف

باش يكون تحضير الملسوقة ساهل عندك، حطّ المقلى فوق الطنجرة بالمقلوب وطيب على قفاها
نصيحة أخرى، خرج ساشي الملسوقة مالكونجيلاتور نص ساعة قبل ما تستعملها وأكيد باش تلقاها طرية وفرشكة