الوصف

الصيف ضيف، وفي هالوقيّت التوانسة عالفروحات يعملو الكيف، وكي تقول فرح تقول تصنيف مالمالح للحلو المهم يفرحو بالضيف، وشنوة الفرح من غير بقلاوة تونسيّة مشحّرة تعمل 66 كيف؟



المقادير

  • 1 كيلوغرام فارينة
  • 1 كأس زيت
  • 2 كيسان ماء دافئ
  • 1/2 مغرفة صغيرة ملح
  • 1 كعبة عظم
  • 1 صحفة نشا
  • 1 كيلوغرام لوز أبيض مسموط ومحمّر ومرحي نص رحى
  • 250 غرام زبدة ذايبة
  • 400 غرام سكر محور
  • 1 كأس ماء ورد
  • 1/2 كعبة قارص معصورة
  • 1 كيلوغرام سكر
  • 2 كيسان ماء

طريقة التحضير

  • 1 - خلّط في صحفة: فارينة + زيت + ماء دافئ + ملح
  • 2 - اعجن الخليط لمدّة 30 دقيقة لين تولي العجينة طريّة
  • 3 - ذوّب في كاسرولة السكر في الماء وخليه على نار هادئة من غير ما تقص على التحريك
  • 4 - كيف تغلي اكسارولة زيد القارص + ½ مغرفة ماء ورد وهبط الشحور مالغاز بعد دقيقتين
  • 5 - خلّط في صحفة أخرى: لوز + زبدة + سكر محور + ½ مغرفة ماء ورد
  • 6 - خوذ العجينة وقسمها كعابر متوسطة
  • 7 - رشّ النشا على طاولة وخوذ كعبورة عجين وحلها بالقلقال لين تولّي رهيفة برشة
  • 8 - عاود نفس العمليّة مع بقية العجين لين يكمل
  • 9 - خوذ طبق وادهنو بالزبدة
  • 10 - حطّ في الطبق 4 أوراق عجين من غير ما تنسى باش تدهن كلّ ورقة تحطّها
  • 11 - حطّ فرشة من حشو اللوز
  • 12 - زيد فوق الحشو 2 أوراق عجين مدهونين بالزبدة
  • 13 - عاود نفس العمليّة لين تكمّل العجين الكل وخلّي الطبق يرتاح مدّة ساعة
  • 14 - قصّ العجين وهو في الطّبق مربعات وادهن مرة أخرى بالزبدة مالفوق
  • 15 - حطّ الطبق في الفور 40 دقيقة
  • 16 - خرّج الطبق مالفور وسقّيه بالشّحور ورجعو للفور مدّة 5 دقائق
  • 17 - خلّي الطبق يبرد وبيّتو ليلة كاملة قبل ما تقصّو

نصيحة الشاف

عجينة البقلاوة قد ما تكون رهيفة قد ما تبدى بنينة وخفيفة، أما رد بالك تتنقب وديما حلّ بالنشا باش يعاونك وتبقى صحيحة