الوصف

المقرونة في هالسخانة تحب اللمة.. وعلى خاتر العائلة عندك أعزّ ما فمّة.. وديتهم بصحين مقرونة بالحوت.. إلّي يذوق منها يقلّك الماكلة من يديك عسل وعلى دبايرك نموت



المقادير

  • 1 مغرفة صغيرة فلفل أكحل
  • 4 مغارف كبار زيت
  • 100 غرام حمص منفّخ
  • 2 أوراق رند
  • 4 فصوص ثوم مهرسين
  • 1 راس بصل مقصوص
  • 1 مغرفة كبيرة فلفل أحمر
  • 250 غرام طماطم معجونة
  • 500 غرام (حوت (كيما تحب: مناني، قاروص، سوبيا، سفن
  • 500 غرام (مقرونة (إلّي تحب
  • 1 مغرفة صغيرة كمون
  • 1 رشة ملح
  • 2 قرون فلفل أخضر

طريقة التحضير

  • 1 - نظّف الحوت وقصو طرنشات كبار وفوحو بالفلفل الأكحل + رشة ملح + كمون وخليه على جهة
  • 2 - قلّي في طنجرة: زيت + بصل + طماطم + ثوم + فلفل أحمر
  • 3 - زيد الماء للطنجرة وحطّ الرّند + الحمص وخلّي الطنجرة تغلي مدة 20 دقيقة
  • 4 - سقّط طرنشات الحوت في الطنجرة وخليها تغلي لين تخثر
  • 5 - أرمي قرون الفلفل وخلي الطنجرة 5 دقائق وهبطها
  • 6 - حطّ المقرونة تتسمط في الماء + رشّة ملح + قطرة زيت
  • 7 - خرّج الحوت مالطنجرة + صفّي المقرونة مالماء وخلّطها بالصلصة
  • 8 - زيّن الصحن بطرنشات الحوت + أوراق الرند + الفلفل أخضر وصحة وبالشفاء

نصيحة الشاف

الحوت كي يطيب يهبط الشوك متاعو، على هذاكة ننصحك، طيب الحمص وحدو في الماء وشوية ملح، وبعد ما يطيب الحوت في المرقة، خرّجو وصفي الصلصلة وحط الحمص معاها وعاود حط الطنجرة تغلي لين تخثر، وقتها أرمي الفلفل الأخضر باش يطيب