الوصف

الكوجينة الإيطالية ماهيش كان بيتزا وسباغيتي, كيف تسخن الدنيا تكثر الدبارات بالخضرة والغلة والجبونات

كيما القنارية المحشية : خفّة ومنفعة صحيّة



المقادير

  • 5 كعبات قنارية
  • 100 غرام بابة خبز
  • 2 كعبة عظم
  • 100 غرام جبن مرحي
  • 2 راس ثوم
  • 1 ربطة معدنوس
  • 2 مغرفة صغيرة ملح
  • 2 مغرفة صغيرة فلفل أكحل

طريقة التحضير

  • 1 - قص القنارية للثلث : تخلي ثلث الأوراق وثلث الراس. ونحي الأوراق البرانية الي تكون يابسة.
  • 2 - بعّد الأوراق على بعضها باليد باش توسّع قلب كعبة القنارية وحطّهم في ماء وعصرة قارص باش ما يكحالوش
  • 3 - حضّر الحشو : خلّط بابة الخبز منفخة في شوية ماء, زوز عظمات, راس ثوم مرحي, الجبن المرحي, المعدنوس وفوّح بالملح والفلفل الاكحل
  • 4 - استقطر كعبات القنارية وقعور الراس من داخل بالمغرفة باش تنحي الشعر ومبعد عبّي كل كعبة بالحشو
  • 5 - قلّي راس ثوم مرحي في شوية زيت. حط كعبات القنارية وقليهم على الشيرات الكل
  • 6 - زيد ماء سخون لشطر المقلى وغطيها خلي القنارية تطيب مدة نصف ساعة. ثبّت في الطياب بالفرقيطة

نصيحة الشاف

تنجم في العشرين دقيقة الاخيرة على النار ترمي كعبات بطاطا مقصوصين يطيبو مع القنارية وتقدمهم بالماء متاعهم