الوصف

كيما العيد متسمّي على لمّ الشمل، الكسكسي زادة يلم العائلة من غير ما إنت تتكلّم، وباش تخلّي العائلة تتلمّ.. فطّرهم كسكسي أزعر بالخضرة واللحم



المقادير

  • 1 كيلوغرام كسكسي
  • 1 كيلوغرام لحم علّوش مقصوص طروف متوسطة
  • 1 كأس زيت زيتونة
  • 2 روس بصل مقصوص جويّد
  • 3 روس بصل
  • 1 رطل سفنّاريّة
  • 1 رطل لفت
  • 1 رطل قرع أخضر
  • 1 رطل قرع أحمر
  • 1 رطل فول أخضر
  • 1 رطل كرمب
  • 1 ربطة كسبر
  • 1 كأس حمص منفّخ
  • 1 مغرفة صغيرة سمن
  • 1 مغرفة صغيرة كركم
  • 1 مغرفة صغيرة فلفل أكحل
  • 1 مغرفة صغيرة زنجبيل
  • 1 رشة ملح

طريقة التحضير

  • 1 - قشّر الخضرة الكل وقصها وخليها على جنب
  • 2 - قلّي في المفقول: لحم + بصل + زيت + فلفل أكحل + ملح + كركم + سمن + زنجبيل
  • 3 - زيد ما يقارب 2 لتر ماء + حمص وخليه يغلي نص ساعة
  • 4 - حطّ الكسكاس فوق المقفول وخليه يخرّج الأبّاخ
  • 5 - فرّك الكسكسي بالزيت + رشّة ماء وحطّو في الكسكاس يتفوّر
  • 6 - أرمي في المقفول: لفت + سفنارية + فول + كسبر وخليهم يطيبو نص طياب
  • 7 - فرّغ الكسكي في قصعة وعاود رشّو بالماء ورجعو للكسكاس باش يتفوّر التفويرة الثانية
  • 8 - أرمي في المقفول: كرمب + قرع أخضر + قرع أحمر وخلّيهم يطيبو
  • 9 - (تفقد الكسكسي وعاود تفويرة ثالثة (كان لزم
  • 10 - فرّغ الكسكسي في قصعة وفركو بشوية سمن ومن بعد بثبثو بشويّة مرقة
  • 11 - خرّج الخضرة واللحم مالمرقة وكمّل سقي الكسكسي
  • 12 - فرّغ الكسكسي في صحفة كبيرة وزينو باللحم والخضرة

نصيحة الشاف

قدّم اللبن للعائلة مع صحفة الكسكسي وصحة وبالشفاء