الوصف

كي ما خلطناش على عهد البايات.. ما فيها باس نتبنّنو طاجينهم المزيّن طبقات... ألوان زاهية تذكرّنا في الربيع... ننصحك تحفظ الوصفة قبل ما تغبر عليك وتضيع



المقادير

  • 1 مغرفة صغيرة كركم
  • 1 راس بصل مفروم
  • 50 غرام جبن مرحي
  • 100 غرام جبن البارميزان مرحي
  • 100 غرام معدنوس
  • 200 غرام سبناخ
  • 250 غرام ريقوتا
  • 9 كعبات عظم
  • 500 غرام لحم مفروم
  • 1 مغرفة كبيرة زيت زيتونة
  • 1 مغرفة صغيرة ملح
  • 1 مغرفة صغيرة فلفل أكحل

طريقة التحضير

  • 1 - قليّ البصل في الزيت + لحم مفروم+ شوية ماء لمدة 5 دقائق
  • 2 - قسم اللحم لـ3 طروف متساوية
  • 3 - فوّر السبناخ
  • 4 - خوذ الطرف الأولّ وخلطو مع: 3 كعبات عظم + 2 مغارف صغار جبن البارميزان + 1 مغرفة جبن مرحي + السبناخ المفور + ½ مغرفة صغيرة كركم + رشة ملح + رشة فلفل أكحل
  • 5 - أدهن طبق الفور بشوية زيت وحط في وسطو الخلطة إلّي حضرتها
  • 6 - حطّ الطبق في الفور مدّة 10 دقائق وتحت دراجة حرارة 180
  • 7 - خوذ الطرف الثاني ماللحم إلّي حضرتو وخلّط معاه: 3 كعبات عظم + 2 مغارف كبار ريقوتا + 1 مغرفة كبيرة جبن البارميزان + مغرفة صغيرة كركم + رشة ملح + رشة فلفل أكحل
  • 8 - خرج الطبق مالفور واعمل الطبقة الثانية مالخليط إلّي حضرتو وعاود رجعو للفور 10 دقائق أخرين وتحت نفس درجة الحرارة
  • 9 - خوذ الطرف الثالث والإخراني ماللحم مفروم وحطّ معاه: 3 كعبات عظم + معدونس مقصوص + الجبن إلّي بقالك + شوية كركم + رشة ملح + رشة فلفل أكحل
  • 10 - بنفس الطريقة تزيد الطبقة الثالثة للطبق متاعك وترجعو للفور 10 دقائق أخرين

نصيحة الشاف

ديما أركض العظم وحدو قبل ما تزيدو للخلطة وماذابيك تبدى بأبيض العظمة باش الطاجين ينفّج ويعلى