الوصف

في رمضان إنت عليك بالدّبارة ومولى بيتك عليه بالشهوات.. وأكثر حاجة تهمّو الخبز المفوّح البنين.. تلقاه يفركس من بلاصة لبلاصة ويجيبو يا لندرى منين.. مبسس، طابونة، ضفيرة.. أشكال وألوان تقول عليك خليتو جيعان.. أيا شنوة رايك تقص عليه المصروف الزايد وتفوّحلو خبيزة دياري تنحيلو حشيشة رمضان؟



المقادير

  • 1 مغرفة كبيرة أفّاح خبز: سينوج، بسباس
  • 25 غرام خميرة خبز
  • 1 كأس زيت
  • 500 غرام فرينة
  • 1/2 لتر حليب

طريقة التحضير

  • 1 - حطّ في خلاط: فرينة + زيت + خميرة خبز + حليب
  • 2 - قسّم العجينة إلّي تحصلت عليها لطروف متساوية
  • 3 - أعمل من كل طرف الشكل إلّي تحبو
  • 4 - حطّ أشكال الخبز في طبق فور وأدهنهم بالعظم مالفوق
  • 5 - خلّي الخبز يخمر لمدة ساعة ونص
  • 6 - حطّ الطبق في الفور لمدة ربع ساعة وتحت درجة حرارة 180

نصيحة الشاف

تنجّم تزيد رشّة سينوج للخبز مالفوق، وتنجّم زادة تفوح الخبز متاعك بالجلجلان، فمة شكون يحط شوية زيتون مقصوص وفمة إلّي مغروم بالزبيب وصحة وبالشفاء