الوصف

في رمضان حتّى المقرونة تولّي مشتهية.. وتخمم مولات الدباير في صحين محرّر عالطاير.. تلم بيه العائلة الكل.. من الكبير للصغير غاطسين في المقرونة الفل



المقادير

  • 2 مغارف كبار طماطم معجونة
  • 3 أوراق رند
  • 1 كأس زيت
  • 1 مغرفة كبيرة نعناع شايح
  • 2 مغرفة صغيرة فلفل أكحل
  • 1 مغرفة صغيرة ملح
  • 3 مغارف صغار ثوم مرحي
  • 1 مغرفة كبيرة فلفل أحمر
  • 1 مغرفة كبيرة تابل وكروية
  • 250 غرام لحم مفروم
  • 1 رطل مقرونة فل
  • 1 مغرفة صغيرة هريسة عربي
  • 50 غرام حمص منفّخ
  • 1 كعبة بطاطا مقصوصة على 4
  • 1 قرن فلفل أخضر

طريقة التحضير

  • 1 - فوح اللحم مليح بالفلفل أحمر + الثوم المرحي + التابل + الملح + الفلفل أكحل + النعناع الشايح
  • 2 - قسّم اللحم المفوح كعابر صغار
  • 3 - في طنجرة: قلّي الزيت + الثوم
  • 4 - حطّ معاهم كعابر اللحم
  • 5 - كيف تتقلى الكعابر وتشد روحها زيد معاها: الطماطم المعجونة + الهريسة العربي + الفلفل الأحمر + التابل + الملح
  • 6 - كيف تتقلى الطنجرة زيدها الماء + الرند + حمص منفّخ وخليها تطيب
  • 7 - زيد فوقهم: البطاطا + الفلفل الأخضر
  • 8 - أسمط المقرونة في الماء وبعد ما تصفيها زيدها رشة فلفل أكحل وخلّطها بالصلصة

نصيحة الشاف

عز المقرونة كيف تاكلها سخونة، وعز المقرونة زادة كيف تبدى مشخشخة بالصلصلة، ونصيحتي ليك بعد ما تخلط المقرونة خليها 3 دقائق عالنار باش تزيد تشرب الصلصة مليح وصحة وبالشفاء