الوصف

إذا اتبّع اللون يتبدّل وإذا اتبّع الطّعم يتبدّل وحتّى كان اتبّع الدّبارات هي زادة تتبدّل، هكّة هي القنّارية، تجي سلاطة، تطيب محشيّة، تتزاد للجلبانة وإلاّ تلقاها في مقرونة جارية مرميّة، أمّا المرا الحرّة الزمنيّة تعمللنا منها مرقة زعرة بنينة ومشتهية



المقادير

  • 500 غرام لحم علوش
  • 12 كعبة قنّاريّة
  • 1 راس بصل مقصوص
  • 1 كأس زيت
  • 2 كعبات قارص
  • 1/2 مغرفة صغيرة زعفران
  • 1/2 مغرفة صغيرة فلفل أكحل
  • 1 رشة ملح

طريقة التحضير

  • 1 - قصّ اللحم وقليه في الزيت + بصل + فلفل أكحل + ملح
  • 2 - امرق اللحم بالماء وخليه يطيب لمدّة ساعة
  • 3 - قشّر القنارية وقصها أنصاف
  • 4 - قشر كعبة قارص وقصها طرنشات
  • 5 - زيد فوق اللحم: القنارية + طرنشات القارص + الزعفران وخلّي الطنجرة تغلي 20 دقيقة
  • 6 - مرقة القنارية الزعرة حضرت وما عليك كان تزيدها رشة فلفل أكحل مالفوق وصحّة وبالشفاء

نصيحة الشاف

كي تنظّف القنارية ادهنها بالقارص في وقتها باش ما تكحالش